ЗАБИЛ МЭДОЖ: ШЕРОН, ИЙЭН ЛЭТИФОН

ШЕЙ-ШЕЙ ТЫНЫМ ВЕ ПИДЯ!

Семонон выл явясоре,
Мартя мангдя яв ща соре.
Щич зындяним ым чы сыре, -
Шей-шей тыным лап ве пидя.

Былбыл щандя вылон сядя,
Мяхлоь щяммя ыштя кядя.
Ьурбятядя умрым шедя, -
Шей-шей тыным лап ве пидя.

Такандеро кятон чоке,
Нявемони я тон чоке.
Боямяно Вятян чоке, -
Шей-шей тыным лап ве пидя.

Ща вотякяс мерд ябыни,
Кыло ъитон гырд ябыни.
Бо йоли жо дард ябыни, -
Шей-шей тыным лап ве пидя.

Шяфкя пеьят, кыло быня,
Курки еват, поло быня.
Щич мандяни щяни щыня, -
Шей-шей тыным лап ве пидя.

Чы товсони щавзя чимян,
Еь гырдякя, бящя и мян.
Орзуйон щяля бя нимян, -
Шей-шей тыным лап ве пидя.

Хыдой чямя игля хыванд,
Ныбим бочи бяты пявянд?
Шиш дяшиш бя жогля кямянд, -
Шей-шей тыным лап ве пидя.

Чы мящоли зымсон сарде,
Ымян бомы гыляй дарде.
Забил бяшты ся бягарде, -
Шей-шей тыным лап ве пидя!
***

МАНДЯНИ

Бяшяв-бяруъ конжо ныштян, вотдян ду,
Толыш ысят щясряте бя тыршя ду.
Тяйля дасе, мандя бещол, нише зу,
Чокя ъимон чиче, щяни зындяни,
Ня йоляти, ня рукяти мандяни.

Дардыш вейе, щижо зындяни воте,
Щяммя гитин, яв жойли мандя, поте.
Дыштя дыли но-пеьят кардя, моте,
Бяштя дарди гыляй ханбоз виндяни,
Ня йоляти, ня рукяти мандяни.

Руъ омейдя руъи сяпе, бедя манг,
Чы фяьыри коон шедян щеъо ланг.
Кардяшоне щевъя зямин бяйо танг,
Ъыьо мязлум, фяьыр гыляй бяндя ни,
Ня йоляти, ня рукяти мандяни.

Ща омякяс жури вотдя чяй номи,
Пучя кардя, песындындя чяй туми.
Дардыш вейе, - бывотом аз, вай, коми?
Ын хывятон щички ося ьандяни,
Ня йоляти, ня рукяти мандяни.

Шяьол омейдя, бяйо бедя нечи,
Ячяй яндя дябон кардедя щиччи!
Вотдя беши, пеьят ты ыштя кучи,
«Авестя»дя нывыштяйон щандяни,
Ня йоляти, ня рукяти мандяни.

Бобокядя бяйон нокян бо ьули,
Йянды седян-щяватедян бя пули.
Йод бекардян - умъян бябен бя тули,
Тул шя руъи щички бя йод дяндяни,
Ня йоляти, ня рукяти мандяни.

Мядоъ ыштя дими бявон гятедя:
Вотя гяпон нав нывотя патедя.
Бяня мерди бя толышон вотедя:
Чаня ди ни, шымя ьябшон кандяни!
Ня йоляти, ня рукяти мандяни!

***

МЯДОЪИ ГЯПОН

Толыши зоон,
Жон бяшмя ьыбон.
Бой бя дешмени
Мядянян ямон.

Дешмен зуманде,
Хыдо хыванде.
Щич мятарсянян,
Пештымон банде.

Бяйштян бя сяпо,
Пеьятян ляво.
Явон ве сыхан,
Ваныдян гяво.

Щяшйя вя шяьол,
Пуре ын мящол.
Ъыьо зузедян,
Сыпон бян бещол.

Ларйя гыйя каг,
Йаншяье, маймаь.
Моьняш гордыня, -
Омя ячяй маг.

Щяхи щардедя,
Зящля бардедя.
Дячямя пули,
Ьоняь вардедя.

Щяво бяй музе,
Фикыш чяй лузе.
Мяхлоь ьыр бедя,
Игля яв «тузе».

Рящбяре дяжжол,
Додяни мяжол.
Пеш быкямон яй,
Бя чыл гязя чол.

Щяля колимон,
Лап бещолимон.
Чы бетямя ку,
Ямя фолимон.

Кардян аз ловя,
Мябян сйо товя.
Бячмы сыхани,
Кардянин бовя.

Щяво гемыъе,
Дешмен сыбыъе.
Песпындя хуни,
Бяйо ьяб оъе.

Чымы шиня бон,
Бяшмя ся чявом.
Йодо бемякян,
Мядоъи гяпон.
***

ЙОЛОН СЫХАН

Щамсуя кося теля косяй.
Щамсуя бевяжян быбо, ты бевяжяти мякя.
Ыштя отяши перышт, бя щамсуя бо отяшя чяши мяши.
Бевяжя щамсуя ъыьо бязней отяшя чяш диляге.
Щамсуя бевяже, куч быкя.
Хыдо сыфтя бя щамсуя, пешо бямы быдя.
Пидяни щамсуятиядя вот-выъян быбу, ыштя янги ьойм быкя.
Чяпя щамсуя дышты арядя пардяй.
Гомуш бяштя баля ляьы ьандяни, ыштя му ловнедя, баля зындя ки, ня-ня яй бя нез щаштяни.
Гомуш чанядя бевяж быбу, дыгля зандягой.
Буйя зандяго и годуш шытыш дой, чяьынян ъяше ляьы явыш пеш кар-де.
Бяняй говури бызи йани-йани мяши.
Бя щяйшон воте мярифятин быби, шей хылартыш щарде.
Бо аспи тумо быъян, янжях чяй ляьы йодо бемякя.
Ьяты асп ябыни, янжях щяйся зуманде.
Аспи сядя ьошя бе, яй мястян, йясое.
Кубыз лоня гятдяни.
Вяйян бо каги йасей.
Асп ъиядя ыштя хыванди ныланго.
Явлод киняй, зоя чы дешмени чяши довиляй.
Чокя зоя чич кардя дядя моли, бевяжя зоя щич кардя дядя моли.
Хыдо бяштя бяндя игля быдя, фяр быдя.
Зоя бягыней пыядя, киня бя моя бяшей.
Чокя киня пя сяй бя зямин яъянний.
Зоя ды киня игля вырядя омяьят, гыляй отяше, гыляй кыляш.

МЯДО ЛЯТИФОН

ЧОКЯ ЖЯФЯНГИОТ ВОТЕЙ

Хыдо рящмят быкя Мири маму, Мядо сипришбе. Ки тикя вахтыш ябий, ряря яший чяй кяй ки, гыляй чокя сыхан бымясо.
И руъ шанговяся хяйли мяхлоь иъян гырдя бябе чявон кядя. Шаризя номядя фи-зикя мияллим бя щички ямон додяныбе ки, и кялмя явян бывото. Щеъо чы Гярбя-чови перестройкяку вотдябе. Мыхляс, огыне бя пештя еряхяй бя Мири маму, хя-бяш сяй: -Ща, Яьяболи, чокняйм воте?
- Баля, ты лап чокя жяфянгийоты вотей.
***

СЯРИНЯ ПИВЯ

Мядо мяктяби чайчиядя (Щязяри чайчиядя) йоля мердон ныштянбян, чявон сядян рящмятдиг Мяло Ибращим. Яв омякясонку хябя седябе ки, бяс шымя тяря-фонядя чы хябон щыстин. Бы дямядя Атакиши маму дяшедя бя чайчи. Мяло хябя гятдя ки, бяс, Атакиши, шымя тяряфядя чы хябя щысте?
Вотдя: - Мяло, Йящйо (чяй зоя) бя буфетыш чокя сяриня пивяш вардя.
***
ШИРВАНЯ КЕФ
Мядоядя Ширван номядя гыляй мерд щысей. Ым яьыляти вахти пеяныштибян бя ро дявардя ярбон думбяля яшийбян бя Боляди, чяйо ды пой явойбян бя кя. Чяйо гяп яъянийбян бо яьылон ки, ымру кефым кардя.
Явей ысян мядоъонку гыляй мясял щысте. Сыхан бя сыхани рясеядя вотдян: «Ширваня кефым кардя».
***
ГДЕ БРЯНЖУК?
Хыдо рящмяткя Йунися маму, мцщарибя ветеранбей. Йолон явотин ки, яв чы мущарибяку омей бя пешт 3-4 мангыш толыши нывотше ки, гуйа чяй йодо бешя.
Бя кя омяжяьи яв фик дойдя ки, яьыл-фылон бячяй чяши гындяни (щяни зындя-ни ки, кахтику (вяшику) яьлон щяммя ьыр бян), бя ъени вотдя: - «Хяйжя, где брянжук»?
***
ВЕ «АЗ» ДЕДОН

Хыдо рящмяткя Ьыбодя маму, чямя щамсуябей. Чыми гыляй сияня гевыш щысбе, яв бя бящр омедяныбе. Яве ше чы Брядигоо гыляй ьясобыш варде ки, бя ьыймят бон, яй ыштя сяйку быкя. Брядиговыъян тырки вотедябей (бявядя тырки воте тоъя-тоъя дяб егынедябе). Ьясоби бя гевы доя ьыймят бя Ьыбодя маму хош номяй, яве бяй вотыше: «Ьясоб ьардяш, ее-ве «аз» дедон!»