Забил тяьдым кардя:
*****************

МЯДО ЛЯТИФОН
(быя ящволотон)

Жями толышон зындян ки, Мядо чы Масялли ряйони гыляй ди номе. Ым ди Озорбойжони зяминядя лап ьядимя выронядя гыляйе - чы Мядо девляти йегоня йодигоре. Мядоъон ве сыханбозин, зярофятчин, ляьляьячин, бя щар гыля ящволоти лятифя ангыл быкясин. Хяйли фик кардебябештя бя ъыьо гыляй ьярор омяймон ки, толыши хяльи фолклори нцмуня тяки ым лятифон ыштя гязетядя чап быкямон, быдя чямя миллят явони ды лязяти бащандо, бысыро. Мядо шаиря зоя Забил сяь быбу ки, ын лятифоныш гырдяш кардя вя бо чапи щозош кардя. Хыдо бя жями мядоъон комяг быбу, Забилян чявон дылядя. Амин!
*****
КИНЯ, ЩЕЙ, ВЯШИМЕ

Мядоядя Кябля Йусиф номядя гыляй мерд бя. Ды йолон вотяй, гуйа яв ыштя ъенику бярк ятарсибян.
И руъ ын биняво чы тукядя омедя бя кя бо чоштя щарде. Дими гятдя бя ъени, ды рыки вотдя: «Киня!..»
Ъен чяй сыхани нимядя щаштя, лап ды рыки вотдя: «Чиче, зя! Чич пидя!»
Фяьыря Кябля Йусиф виндя, бывото чымы чоштя быдя, ъен яй биабур бякай. Яве ноялож мандя, вотдя: «Тявя быдя, бя вишя шедям бо езыми».
- Яве тявя пешкядя, ышты чяшон ку бян, виндянин!
Кябля Йусиф шедя тявя пеьятдя, дяро гындя бя вишя тяряф. Чы кяйку тикяй есиедя, рост бедя бя гыляй былындя выря, ышдя гяви гятдя бя во, ъени сядо кардя: «Киня, щей!.. Бя вишя шедяниме, вяшиме, вяши!..
*****
НИЯ КЯРТОФ

Мядоядя Ханибяг номядя гыляй мерд бя. Вотдян ве чокя инсон бя.
Вяшйяня сор бедя, кядя бо щарде щиччи бедяни. Ханибяг ыштя ъенику хябя седя ки, кядя бо щарде чич щесе?
Ъен воття: -Щиччи ни, янжях бонися тикяй тумя кяртоф мандя, лап чымы пя чы ьябо бешо бо, бяй даст яъянним!
Ханибягя маму виндя ки, вяшику дылыш шедя, фик кардя ки, чокня ын ъени бя дас дяня? Воття: -Киня, ты я кяртофоны ния-моя кардя?
- Ней.
- Вай, киня, щяля бийя ийо дийякямон, бялкя явон щяммяй ниянбу?
Ъен ды тящяри бя ро омедя, кяртофи евардя. Ьоччяья Ханибягя маму, гятдя кяртофи йолягылон нодя бя и тяряф, вотдя, виндяш, киня, ымон щяммя ниян, чымондя тум ябыни.
Чяй рящмятдигя ъен я кяртофон гылвондя, я шявиян явон ъяьо дявондян...

*****
КОСИБИ ДЫВО

Мядоядя гыляй косибя мерд бя. Ын фяьыр ошиьебян бя хани киня. Дастыш щижо нярясибян, явей нымоъися дыво якяйбян ки: -Хыдо, ты мядоъон щяммяй ьыр быкя, игля мыни ды хани киня бащашт!..