БЕФЯРЯ ЯВЛОД

БЕФЯРЯ ЯВЛОД

ХАНЯЛИ ТОЛЫШ

Сабири ьязиня бящри-тявил

Хяйли бянав шо бедябим, выл бедябим обедябим, дышты номи до бедябим, бяшты тяряф гынедябим, тыни ъого зынедябим: бомыно лап жон-жигяриш, бар-бящяриш, ширы-няриш... Шин я рцъон, чяшондя гин бин я рцъон. Ысят щяни дарды-сяриш, ьям-ьящяриш, лап бефяриш... Дыл бя доде! Яьылоны, йцрды шодое: ьязянж бявам воте-воте и рцъ пяриш... Машдя яня Рястовядяш, бо нимяйъя Мясковядяш, шяв егыне хябя рясе, вай няняли, Псковядяш; зындяним щич кон обядяш: зяминядяш, остовядяш. Дцсте дыты Анйя яйо, Сонйя яйо, сосиня дим Манйя яйо, чаня вевя, нимдошя ъен ышты палц гынйя яйо. Яряь седяш, чяхыр ъедяш, пийан бедяш, зындяним щич охо бя ро чоко шедяш; конжо мандяш, бо ки щандяш, чичи щашдяш, чичи ьандяш, чокня бандяш: яряьы ъя да нийя яйо.
Воъор боты ко кардедя, Анйя пцлон то кардедя, ышты чяшон шо кардедя, додя бяты самагони, ышты кцмя хо кардедя. Номы чиче чы йод бешя, щяммя бяты вотдя Мишя, петошя бя ышты ришя, бяштя нясли ты лякя ъя. Яйоне ща щолыш бяты, дояше Петкя колыш бяты, ваштя Тонйя холыш бяты, “сынок” вотдя йолыш бяты, вяс ни мягяр чолыш бяты? Ты ки дяшяш бы ъоьо щол, ки бявоте толыш бяты?
Ъоьо зындяш няьыл быяш, аьыл гятя ныьыл быяш? Дяьыл быяш, бо яряьи, бя пцлийо црцс быяш, хяхол быяш, дорозя бяш дяпарзийя, гыля гядя яьыл быяш, гынойе бяты яьыл воте, лап теьиня шяьол быяш. Ща няведям: чики бояш, чики зояш, чики сефиш, чики ьояш. Мцй дылядяш сяйкц бя по, ки бызыно нияш, мояш, вошиш, вояш: чики вясляш, чики пояш. Рястовядяш, Мясковядяш, остовядяш, кон обядяш, конжош щеъо быманд яйо, бябе ышты хыванд яйо, сяманд яйо, дяманд яйо... Дыл не, пыхя синяш щяни, лозим ныбя чиняш щяни, бя мяхлоьи пиняш щяни, бо ямяно зиняш щяни.
Ды пцли ща едян тыни,
“Чуъой” вотдян, ъедян тыни,
Щяватедян, седян тыни.
Фикир кардям охо бочи,
Новнедя я бядян тыни.
Нызно балян, дядя тыни.
Дябяканде Вятян тыни,
Дябяканде Вятян тыни!

СЯФТЯР

Црцсйятядя бя толышя жощилон номико бя Ханяли дай жявоб

Ном ной бямы – ты бефяриш,
Дарды-сяриш, ьям-ьящяриш,
Явлоды ной кяйкц, пяриш.
Бяс ды ки шиш? Бяс бяке шиш?
“Машдя яве Мясковядяш,
Шанговяся Рястовядяш,
Псковядяш, астовядяш”.
Яння выря гардякяси,
Дай, чыро вотдяш: : бефяриш!

Мясковядя ко кардедям,
институт ся кардедям,
сипи сийоку жо кардедям,
чок щардедям-такардедям,
йолон дыли шо кардедям,
и щардедям, да бардедям.

Ыштя кядя ращат нимон,
Сыредяне чямя димон,
зындянимон ямя кимон.
Вотдяш ямя толышимон,
щяля ямя жо бянимон,
чя ком гону хывандимон?
Ыштя кядя “чуъойимон”...

Вотдян “гиъя толыш” бямя,
гащ вотедян “голыш” бямя,
рцъ додяни йолыш бямя,
щоъо гындя доьыш бямя,
щоъо гындя золош бямя,
щялян вяс ни чолыш бямя?!

Мощтаж бямон бя црцси,
виндянимон бывя-дцси,
Ханяли дай, бызын рости,
йолон дямя кардян ьясти,
тынян марышт чямя “чести”,
“бефяр” мявот бя ща кяси.

Бя ся хо бе, дардым жо бе,
жцря ко бе, дыл шо ны бе,
пцлым ныбе, чяш бя ро бе...
игля кябе, игля со бе,
щукмят гыляй барзя до бе,
Ым йашядя дардым жо бе.

Йолон тоно “чуъой” бямон,
Кямон шодя ой омямон,
Сашя бямон, Мишя бямон,
ыся ряся гыляй зямон,
ямянядяй щяммя чяшон,
йяьын ыме чямя дямон.

“Дябяканде Вятян мыни”,
Йод ныкарде дцзя ко ни,
ды щампокц дылым жо ни,
ьяриб бейо дылым шо ни,
мы ки жо жцр гыля ро ни,
шаир зындя ыштя тони.

Сяфтярим аз, зикир гятдям,
мячит щесе, номоъ вотдям,
фытря додям, рцъя гятдям,
охо, дай-дай, рощат щытдям,
Хыдо изни ниййят гятдям,
бя Вятяни сялом вотдям!

ЬЯЗЯНЯ

БЯ ХАНЯЛИ ДАЙ
(«Бефяря явлоди» жявоб)

“Ве тяьлыд ка ты “Бефяри”,
Жындо карде Минск Сяфтяри.
Чангляй жявоб нывыштыше,
Пцр кардыше чанд дяфтяри”.

Азян сцтим, Ханяли дай,
бочи бекай бефяры зай?
Мясковядя, Рястовядя,
Псковядя, остовядя,
яня вырон гардякяси,
сывой ыштя чандякяси,
дыштя дцмо бардякяси,
“сыпон” мышты щардякяси,
ваьзалондя жондоякяси,
выъорондя мардякяси,
бяняй моли чардякяси,
ве зылмон тов вардякяси
чокня бябе бефяр воте?
Валлащ, бяты щяммя моте!

Ьыйбяты ка Анйя дцмо,
Танйя дцмо, Сонйя дцмо,
состиня дим Манйя дцмо,
ымян гыляй дард бе бомо...
Ысят ваме Вылянози,
рахс кардедям дечяй нози,
щич зындяним товсон-пози,
ко кардедям рцъ дорози,-
чиче яви быкям рози, -
ныбо мыко щич норози:
и рцъ вотдя - хялят быстян,
машки вотдя олят быстян,
зяри-зибо, зинят быстян,
сянятым ни - сянят быстян,
ошко ныбо, хялвят быстян,
ыми быстян, яви быстян,
чыми-чяйко мыннят быстян,
ысят ты бой хыфят быстян!
Чичон вотдя бызын щяни,
тявя ъедя лап чы быни: -
«зардон» щардян ышты нцни,
пешомедян сямягони,
пешо дойдян «мат» дымъони,
сырдяш дявон, ьят нязя ни,
Валлащ, ъыго щич щярзя ни.
Ымон щяля лап бя кяно,
воттян шедяш Анйя тоно,
балябядцм Сонйя тоно,
состиня дим Манйя тоно,
щич ни мяьям айб ботоно?!
Щяля вотдян чы Рястово,
яьыл омя “папа” дцмо –
гавяр кардя гыляй зино?
Щыня щесте мявот бомо,
дынйо бякам вырти-выло,
йод бебякаш Петкя кыло,
бя ся бавам ъыго бяло –
дцз якяни са гляй мяло!..
Щич нызняме чич бя ъени,
дцчо гынйя бячмы жони!

Щяммя ты кай, Ханяли дай!
Вылянози чяшон окай,
Чымы сяпе яви рос кай.
Ве сыханон бекайй гяво,
ве гяпон ъе, ве дой щяво,
ща рос быкям ысят ляво,
щяля вотдя бя кя мяво!
Яве ща рцъ шоддям дяво,
хяйрышян ни мяло дыво.
.
Ханяли дай, рцчкя пеги,
бино быкя тоъя мяшги,
Ысят ъого бынывышт ки,
Сян ныдяъо щяни машки!

Де ве йоля щцрмяти: Бефяри дцст Ьязяня. 1993-2002–ня сорон. Рястов- Мясковя - Псков