Арчонядя алим боле,
Щар кяс гыляй елми йоле,
Пыряфесор Сейфял-мцлцк,
Чы щар елми «кямсямоле».

Поня ясри 89-90-ня соронядя бинобя толыши щярякоти лап навядя шякясон дылядя Бокц Давлят университети црцс ядябийоти ийян нязярийя кафедря мцдир, пыряфесор Сейфулла Ясядуллайеви (Сейфял-мцлцк) хыдмят вейе. Я вахтон вязифядябякясон ийян алимон дылядя кали-кали толышон бя мяйдон беяшин ки, ыштя хяльи милли-мядяни озодяти роядя ко карде хяжолят ныкяшон... Мящз сипириш-пыряфесор С. Ясядуллайев ыштя милляти ъыго гыляй ьейрятмандя зоябе. Хыдо бяй гыляй йоля сябрыш доябе ки, ве вахти бямя - бя жывонон сакит-сакит, де сябри чокя мяслящятон ядяй, ямяни бя сябыр карде дявят якяй. Я вахтон пыряфесор С. Ясядуллайев ийян Новрузяли Мяммядов толыши иминжи жямиййят бя Республикя Толышя Мядянийятя Мяркязи (РТММ - сядрыш Н. Мяммядов бе) ийян «Толыши сядо» ьязети (редактор яв бе) тяшкилати ийян жо проблемон щялл карде горя чы Озорбойжони чан гыляй йоля тяшкилатон ийян чямя милляти вязифядя бя кали шяхсон тоно чан кяря ше-омеко нымандя язйятон якяшин, я йоля алимон бо толыши ко горя кали сявиййясызя одямон тоно бяштя алимя номи кали кяря хялял варде мяжбур ябин...
Пыряфесор С. Ясядуллайев няинки рящбяр, алим, чокя тяшкилатчийе, яв щямян шаир-янвыште. «Толыши сядо» охоня нцмронядя щандямоне ки, ым незонядя чяй толыши зывонядя нывыштябя 308 сящифяня йоля китобыш чапико бешя. Китоби ном «Дызд-тоъячи»йе. Ым китоб щикойон ийян повестонко иборяте. Щяля ки, яви виндямон ни. Янжях бямя мялцм бя кали ясярон щяхядя нывыште вожиб зындямон.
С. Ясядуллайев «Чо са ьырам» ийян «Ды гыля зоям кямсямоле» щикойонядя поня ясри 30-жи соронядя, кялхозон тоъя-тоъя бино бя деврядя, чы толышя хяльи ъимонико пегятябя кали мязяли щодисон де йоля цстояти, бяняй сянядли филми тясвир кардя. Дийямякян ки, ысят щяминя деврико 70 сор дявардя, оъян Толыш щяминя Толыше, Дарчон щяминя Дарчоне, одямон щяминя одямонин, дард-сярон, зярофятон щяминя дард-сярон, зярофятонин, Дарчони «Невский проспект»ян щяминя «проспекте» - оъян ясас ижтимаи-сийаси щодисон бы «проспектядя» иткя жо формядя жяряйон кардян.
Сейфулла мцяллим «Чо са ьырам» номядя щикойядя чы кялхози чичбе вя бя инсонон доя зылми ъого тясвир кардя: «Щяля щич кяс дырыст зындяныбе ки, ым шоьярибя кялхоз чиче, ямма щисс кардябин ки, ым хятоя койе, чы Московя шяйтонон ямяле. Вотдябин ки, чы дивоъон бижори, гандым каштя зяминон, чявон ярябон, щишон, ярябя кялон, негон, йяне чявон ямлакон щяммя бястян чявон дасику, ебякарден бя и выря - бябе цмоми, йяне кялхоз. Одямонян щяммя и вырядя ко бякардян. Нявузи Якбяр, Ялияшяви Яли, тыркя Ибрям тяки ыштя цмрядя щич вахт щич мылкыш ныбя одямон кялхози хябя мясеядя чявон щич мцян нылывя. Бявоно тикян чоке, ысят явон бя жо кяси моли ханбоз бябен. Ямма Мяшя Бибиш тяки йоля мылкыш бя одямон дард-ьямон лап ве бе. Дяштя ьабаря дасон зящмяти, хцни-аки дылядя ьязянж кардя ямлок чо бяпе дасикц бешц? Явон бяки ьысмят бябен? Лцтя Якбяр, щямомчия Мцти мяьям чямя моли ьядри бяня? Чайхонядя ымрцъ щоьо ъыго-ъыго хцн сийо кардя сыбятон шедябин. Одямон ящвол ве тялх бе. 30-ня сор тоъя дяшябе...»
Я вахтон ве одямон де жцря бя жцря вядон бя кялхоз дяаьандин. Мясялян, бо Мяшя Бибиши 400 ьрам ьянд нывыштяшонбе. Щямишя де са-щязо гирвянкя мол ящват-ясян, ьрами чич бе нызня Мяшя Бибиш ъыго зындя ки, бя кялхози иминжи дяше горя, бяйро нывыштябя 400 ьрам ьяндян лап вейе. Яве ки, дыштя аиля цзвон, де щяъдя гыля хараля кися омедя бя кялхози мяьязин. Пешоян мялцм бедя ки, 400 ьрам иткяйе, чяйян нимя щядяря вырядя бя Ашури пешкяш ше. Кам мандя ки, чяй дыл бытыпо, бяштя хыйзони вотдя: «Бышямон чийо, бя жящяндым бымандо чявон чо са ьрам, кялхозян бя чявон чяш дяшц, явон щяммя сыпя зоян. Ымон щяммя чы кцфцрон ямяле». Чя рцъико Бибиши ляьяб мандя «400 ьрам»!
С. Ясядуллайев ыштя «Ды гыля зоям кямсямоле» щикойядя щяминя 30-жи соронядя Дарчонядя ийян чяй мяркязи кцчядя - «Невский проспектядя» жяряйан кардя кали мязяли ящволотон тясвир кардя. Навко бя Нясири Нцсряти «Пыйемон» явотин. Пешо, ды гыляй зояш бя кямсямол дяше горя, яв щеъо ыштяни пеякырний. И рцъян шанго кяляш бя кя оныгарде горя, шедя бя вишя, егынедя бя гыляй хандях, де бя маштя чяйо беше зындяни, щыгоян зиккя ъедя ки, «ай жамат, аз ды гыляй кямсямоли дядям, мыни чийо бекян»! Маштя шыпылыртя Манжядиъон чяй сядо мясдян, яви хандяхикц бекардян, яв бя рцъядя бедя ки, ыштя беьыйрятя кялян зындяни, щыго тякрор кардя ки, «Аз ды гыля кямсямоли дядям»...
Пыряфесори «Дызд-тоъячи» щикойян ве мараьине. Яв ым ясярядя рышвяхорон, дыздон щяммя психолоъи хосйятон бя мяйдон бекардя, жямиййяти ын чыркиня дардон ифшо кардя...
Пыряфесор С. Ясядуллайев ысят Республикя Толышя Мядяниййятя мяркязи сядре. «Толыши сядо» баш редактор Н. Мяммядове. Толышон роядя бя чявон хыдмяти ьыймят ныдой гыляй йоля ношцкцряти ябий. Шцкр бя Хыдо ки, нящойят, 7 сори бяпештя де «99» тираъи «Толыши сядо» бя мяйдон бешедя. Де С. Ясядуллайеви ийян Н. Мяммядови имза бешя «Бя щандякясон нязя» (2001-жи сор, ийун, № 1) номядя баш мяьалядя явон ъого нывыштян: «Де ве йоля мадди ийян тяшкилоти конко бяпештя, «Толыши сядо» ьязети иминжи нцмря дярж кардямоне. Ьязет де Н. Мяммядови шяхси вясаити щисоб чап бедя. II нцмрян и тящяр чап бякамон. Янжях пешо бямя мадди комяг ныбо, ьязет беныбяше.
Чы РТММ ийян чы гязети ня гыляй мадди вясаит, ня гыляй цтаьыш, ня гыляй цстцлыш, ня цнваныш, ня телефоныш, ня мцхбир-ъурналистыш, ня фото-мцхбирыш, ня ряссамыш, няян и ьрам коьязыш ни... Щар ше сыфырико бино кардямоне. Ьязет чямя цмуми койе. Яве ки, ьязети мцнтязям дярж карде горя бя комяьи ещтийожмон щесте... Пештепцримон ки, ве кясон чямя сядо бямясен».
«Толыши сядо» иминжи нцмря бешя рцъико и сорисян ве дявардя. Чямя зыняй, чяй жями щафт нцмря бешя. Яфсус быбо ки, чы толыши ве ярбобя зоон гцшон боштя хяльийо ъыго корин ки, явон «Толыши сядо» мясдянин. Янжях жо хяльон сядо чок мясдян. Чявон и поя боштя шяхси кефийо сярф кардя щязо-щязо долларон ашмардя сядоко фейзиййаб бедян.
Чич быкямон?! Хыдоян щяхон-нощяхон ийян сявобон сящищ ашмардя...
Бя Сейфулла мцяллими ийян бя Новрузяли Мяммядови оьорон орзц кардямон! Хыдаванди-алям ыштян бяшмя комяг быбо! Чямянян дявардя сящвон, гцсцрон быбахшян!!!